中環出更：孫榮聰帶隊訪台拓視野
自創品牌唔容易，工業總會青委一班工業界第二代，早前就組團去台灣參觀三間成功衝出亞洲嘅台資企業，包括手機、電腦及單車廠。前工總主席孫啟烈大仔兼青委主席孫榮聰（Eric）負責帶隊，團友仲有工總副主席劉展灝大仔劉燊濤（Gary）及德國寶董事長陳國民大女陳嘉賢兩位青委副主席，共三十幾人浩浩蕩蕩出發。
參觀廠房收穫豐
Eric話，青委成員家族多數喺內地設廠，再安排參觀內地廠房意義唔大，所以今次特登去台灣睇廠，結果收穫豐富。佢印象最深刻嘅係台資企業打造品牌融入當地文化及價值觀，例如今次參觀台灣最大嘅單車廠捷安特（Giant），佢哋將踩單車包裝成為追求健康生活嘅新時尚，令單車順理成章融入民眾生活，難怪銷量高企。
Gary就勁讚台資廠提供畀員工嘅福利設施好有規模，例如偌大嘅泳池及健身設施，同行嘅兄弟姐妹都話大開眼界。