中環出更：梁福元娶新抱出動南瓜車
十八鄉鄉事委員會主席梁福元前日新翁之喜，兒子梁明堅（Jason）迎娶貌似華姐冠軍苟芸慧嘅Alice，喺旗下元朗大棠生態園林酒家筵開四百席，期間梁福元仲出動埋最新由澳洲一間馬車公司引進荔枝山莊嘅英式南瓜形馬車，載住一對新人穿梭大棠屋企、祠堂及酒家，呢場王族式婚禮確係夠晒排場，難怪開支高達七位數字喇，咁大件喜事，當然唔少得親朋戚友到場恭賀啦！
前晚出席嘅嘉賓除咗鄉議局主席劉皇發、一班鄉議局當然執委及元朗多個鄉頭外，仲有民建聯立法會議員梁志祥、新民黨田北辰、中華廠商聯合會立法會代表林大輝及一班元朗區區議員及部分省市級政協等。再加上十八鄉嘅村民，所以擺盆菜宴擺足四百圍都坐得落囉。
民記鄉事派似破冰成功
作為新翁嘅梁福元相當高興，全晚滿場飛答謝賓客。期間Jason更高歌一曲答謝爸爸養育之恩，梁福元聽到梗係冧到爆啦。不過，講到高興，梁志祥都應該好高興，因為佢不但被安排坐喺發叔隔籬，期間仲不時同啲鄉頭密斟，似乎完全瓦解咗之前有關民記同鄉事派不和嘅傳聞。至於田北辰就話，佢以前仲係自由黨成員嘅時候，已經經常同梁福元有聯絡，所以佢話梁福元娶新抱，一定要捧場喎。
卓妮