寮屋劏房氾濫，其中一名土地業權人李先生承認本身亦屬受害人。李指早在數十年前已將有關土地全數租予不同農戶，但土地多年來卻被租戶「租上租」，一年前始發現農地被違規建造大量劏房，已即時向地政署反映問題。
「呢度依家就好似九龍城寨咁愈起愈多，救火車又到唔到，火燭燒死人你話點算？」李指現時村內所建劏房單位共逾四十間，逾百幅農地幾乎皆有不同類型的違規改建，不滿向地政署投訴逾年仍未獲積極跟進，「我試過去同僭建嘅人傾，佢哋都唔肯合作，地政署淨係出咗封信就算，根本就唔係做嘢嘅！」李又稱，由於大部分農地出租時只訂立口頭合約，倘要就違建問題終止租約料將困難重重，正為解決問題頭痛不已。