養兒一百歲，長憂九十九。今時今日，養兒育女一啲都唔簡單，憂經濟能力不足，憂居住空間唔夠，憂搵唔到好學校，憂讀書成績唔好，甚至連揀邊隻牌子奶粉都要憂，真係可憐天下父母心。
唔係講笑，本報早前抽查市面上嘅嬰兒食品，發現高達六成樣本鈉含量超標，一半卡路里超標，逾三成脂肪含量超標，父母唔擔心就假。
嗱，消委會調查發現，市面上嘅嬰兒奶粉推陳出新，噱頭多多，有啲聲稱含獨特營養成分可以「軟化便便」，有啲就話擁有獨家專利配方可以「增強免疫力」，有啲甚至話食完智力過人添，吹到天花龍鳳。但實際上，唔少營養宣傳言過其實，根本未經科學研究證實。立法會尋日就規管嬰兒食品舉行公聽會，多個團體批評現時好多奶粉廣告有誇大、誤導甚至洗腦成分，促請當局盡快立例規管。
冇錯嘞，嬰兒食品五花八門，搞到父母眼花繚亂、無所適從，點解政府到今時今日仲未立例規管呢？講起就一匹布咁長。早喺○八年，當局已經制訂食物營養標籤法例，規定所有預先包裝嘅食物要按指定格式貼上營養標籤，詳細列出營養成分，但唔知點解，三十六個月以下嬰兒食品竟然獲得豁免。時至今日，食物及衞生局先至展開諮詢，計劃立例規管喎。唉，遲唔遲啲吖！
其實，遲唔緊要，最弊即使日後立例規管嬰兒食品，亦無法規管誤導銷售。當局話喎，因為規管產品嘅誇大同誤導陳述好複雜，好具爭議性，所以要押後處理。話時話，商戶打開門口做生意，貨真價實只係基本要求，尤其係嬰兒食品，安全可靠更加重要，當局連立例規管誤導陳述都話有難處，點樣適度有為呀。
嬰兒食品無王管，後果可大可小。近年內地問題奶粉層出不窮，大頭奶粉有之，三聚氰胺毒奶有之，皮革毒奶亦有之，無數嬰兒受害，父母聞奶色變，歸根究柢都係因為官商勾結，監管不嚴。香港再唔加強監管，遲早好似內地咁，搞到民以食為憂嘅咋。
無論點都好，立例規管嬰兒食品已經拖足四年，呢個前朝政府留低嘅爛攤子，唔可以再爛落去。新政府口口聲聲「急市民之急」，講就好聽啦，但究竟做唔做得到，仲要睇過至知，好心港產官僚加多兩錢肉緊，盡快撥亂反正，唔好再拖泥帶水啦！