上屆立法會選出後冇耐，民主黨甘乃威就被爆涉嫌因求愛不遂而怒炒女助理醜聞，不但成為首位被立法會正式提出彈劾動議嘅議員，仲間接令佢做滿一屆四年任期後就被迫棄選，政途行人止步。有傳一位代號叫「劉番啲」嘅政界人士，亦同佢嘅靚女助理有染，但由於雙方似乎係你情我願，加上傳聞中嘅「劉太」好似唔知情，或者知情而刻意唔出聲，事件至今都未喺傳媒曝光！
「劉番啲」同女助理有染嘅傳聞，早喺今年暑假期間傳出，有唔止一個目擊者指出，「劉番啲」同佢嗰位樣貌端好嘅女助理，出席大小活動都出雙入對，有講有笑，態度親暱，就連返工放工都見到佢哋一齊，唔知情嘅仲以為呢位靚女就係佢老婆。
消息人士又話，「劉番啲」聲稱已婚，自言同老婆非常恩愛，但佢多次話會帶埋另一半出席社交活動，但「劉太」每次都借故放飛機，次次最後都得番「劉番啲」一支公現身。即使係佢至friend嘅政界朋友，都話未見過「劉太」尊容，甚至連叫乜名乜、做乜嘢都唔知。有人甚至質疑「劉太」根本係個虛擬人物，即使真實存在，亦可能一早同「劉番啲」冇晒感情，再者雙方咁多年都冇仔女，先會對老公嘅緋聞隻眼開、隻眼閉囉。