由鄉議局一班鄉紳夾份為主席劉皇發鑄造嘅「劉皇發銅像」，坐喺沙田石門鄉議局新大樓已一年有多，一直無風無浪，點知尋日被一班鄉民「開齋」。話說一班爭取新界村屋僭建合法化嘅鄉民，尋日拉隊去鄉議局請願，不滿局方冇為村民出頭，矛頭直指最高話事人發叔。雖然班鄉民最後都成功向發叔遞交請願信，而發叔亦痛斥班鄉民要飲水思源，但班鄉民臨走前將啲示威牌插晒落發叔銅像身上，好彩銅像唔識痛啫，咁係咪算幫發叔擋咗煞呢？
