政情：周永勤懵盛盛想收割國寶
好多人都鍾意影完相擺上社交網站分享。尋日我哋就喺網上發現，自由黨元朗區議員周永勤留言話收咗碌「紅豆杉」，佢話開頭仲以為係碌爛木，點知原來係珍貴植物，仲叫大家一齊去貴州收割添！但紅豆杉其實係國家一級珍稀保護植物，同華南老虎、四川熊貓一樣，被列入聯合國教科文組織嘅瀕危級別，邊個咁夠膽將碌懷疑係國寶嘅木運嚟香港呢？
我哋搵咗周永勤求證，佢話碌木係街坊送畀佢嘅，聲稱可以發放負離子，叫佢擺喺辦公室。周永勤話，佢根本唔知碌嘢係咩嚟，後來有第二個街坊同佢講碌嘢係「國寶」，佢先至發覺今劑大鑊喇，所以拿拿聲丟咗碌木。嘩！咁咪同丟咗隻熊貓冇分別？真係捨得咁大嘥？周永勤仲話，成件事好離奇，好似拍警訊咁，覺得自己被政敵設局屈佢，所以下次都會小心啲喎！其實從政就幾時都要小心o架啦！
