政情：蘇樹輝獲澳大頒榮譽博士
澳博行政總裁蘇樹輝日前獲澳門大學頒發榮譽社會科學博士，以表揚其專業和藝術事業上嘅傑出成就，以及對社會嘅貢獻。蘇樹輝自幼數學同理科成績尤其突出，難怪佢依家每次講起博彩收入數字，分毫不差，而佢喺澳門博彩圈工作逾三十五年，建樹包括策劃並推動唯一植根澳門嘅賭牌公司喺香港上市，帶領澳門進軍國際金融市場。
蘇樹輝一直堅持澳門就係澳門，發展本地特色成為世界旅遊休閒中心已足夠，毋須複製其他旅遊城市模式，事實證明佢好有眼光。
蘇樹輝熱愛工作之餘，亦寫得一手好字，佢研習書法多年，曾喺中港澳台等地舉行個人書法展，連國學大師饒宗頤都讚佢寫得靚，中外著名藝術博物館，更爭相收藏佢嘅作品。