政情：葉劉解畫 曾蔭培整數叻紮職
最近有套熱門港產片上演，內容講述警隊高層權鬥，仲涉及廉政公署同保安局，好多人都嘗試分析電影內容，但論資格一定非做過保安局局長嘅新民黨主席葉劉淑儀莫屬。葉太一連兩日喺網上拆解齣戲嘅細節真偽，仲爆料話戲中郭富城飾演嘅警務處副處長（管理）被揶揄升職升得快，皆因識得整靚盤數，同當年現實中一位姓曾嘅副處長好似喎，仲話唔知齣戲係咪影射緊佢。
葉太喺九八年升做保安局局長，當年嘅警務處副處長（管理）真係有人姓曾，就係「貪曾」曾蔭權個細佬曾蔭培喇。葉太話當年經濟差，政府限定部門開支增長唔可以超過百分之一，而呢位曾姓處長就擅長整靚盤數，又係睇內部管理，自然升職升得快啦，同戲中深得政府高層器重嘅郭富城好相似，大家都係最叻整靚盤數。葉太仲話，現實生活兩位副處長嘅權鬥時有發生，但內容有幾激烈，佢就冇透露喇。
不過，齣戲都有啲唔正確嘅地方，葉太話，例如局長與同袍之間嘅稱呼，好少以「先生」稱呼，而係叫「局長」，甚至直呼其名，佢當年就叫曾蔭培做「YP」，叫李明逵做「阿Dick」，而下屬就會叫葉太做「阿dam」，咪係Madam咁解囉。