政情：陳仲尼「染紅」考評局？
明日舉行新一屆港區全國人大選舉簡介會，個個想選人大嘅建制中人都會現身，順便收吓風睇吓有咩對手。自從傳出全國青聯副主席陳仲尼（Rock）有意參選人大後，惹來教育界好大反彈，事關阿Rock唔單止有全國青聯身份，現時仲兼任考評局主席，負責睇住全港考試制度，可以講係主宰全港十幾萬考生嘅命運，擔心佢做咗人大後，令考評局染紅，分分鐘連通識科都滲透「極紅」思想。
陳：兩者唔會有衝突
十位教育界選委尋日齊齊聯署發表公開信，反對阿Rock參選人大代表，佢哋包括黃克廉、韓連山、潘天賜、區伯權等，個個都係教協理事，當中黃克廉更係教協副會長。佢哋要求阿Rock選人大就要先辭去考評局主席一職，因為過去咁多屆嘅主席，都未有人是身兼政府部門或議會職位，如果主席變成人大代表，擔心會有角色衝突，影響考評局政治中立及獨立形象，假如阿Rock唔肯辭職選人大嘅話，佢哋話抗議行動陸續有嚟。
雖然教育界有咁大反對聲音，但似乎未動搖阿Rock「一路向北」嘅決心，佢尋日回覆我哋查詢時話，人大職務只係參與國事，為國家擔任立法角色；而考評局只負責香港事務，兩者分得好開。佢仲強調，考評局主席唔會負責改試卷，亦唔到佢訂立評分準則同考試題目，主席一職只負責考評局嘅機構管治、財政、人力資源同資訊科技，唔會有利益衝突。至於係咪一定會參選人大，阿Rock就話現時仲考慮緊，未有最終決定，總之自己無論做咩崗位，都係問心無愧喎。
易構成瓜田李下嫌疑
其實政界內一人同時有幾項公職都係普遍情況，但做人大又唔同講法，因為人大嘅功能同職級，等同喺中國內地做議員，負責為國家立法畀意見，無可能做到政治中立。如果佢做人大後，有試卷題目又被人發現夾雜內地色彩，大眾第一時間會入晒阿Rock數，到時政府真係多得佢唔少囉，呢啲算唔算係為新政府添煩添亂呢？雖然無明文規定考評局主席唔可以做人大，但瓜田李下嘅概念，相信阿Rock冇理由唔知啩？