中環出更：「三十會」生日 各界政商名人出席
智庫「三十會」尋日舉行成立九周年活動， 叫得智庫就跨越各黨派之爭，所以無論係「梁營」核心人物好似行政會議成員張震遠同羅范椒芬、昔日嘅「唐營」中人好似胡定旭等，以至泛民主派多名立法會議員都有出席，加上至少六名會參加港區人大代表換屆選舉嘅政界人士都「滿場飛」疑似拉票，搞到現場可謂水洩不通。
副局政助現身支持
○三年成立嘅「三十會」尋日喺中環某咖啡店舉行周年活動，政商界好多重量級人物都出席，好似公務繁忙嘅政務司司長林鄭月娥，中央政策組顧問王卓祺和高靜芝，以及多名副局長、政治助理都有出席同各界「打交道」。
剛由公務員體系轉入問責行列嘅教育局副局長楊潤雄（Kevin），甫現身就同觀塘區議會主席陳振彬好好傾。對於前晚經過長達五小時後，才達成中一減派方案，Kevin話最緊要大家傾得掂，又話自己正在熟習工作。
重返政府嘅勞工及福利局政治助理莫宜端，當問及早前有份聯署反德育及國民教育科，佢話當時係以公民身份表達意見，又力撐政府為長者生活津貼拍攝宣傳片有佢嘅原因，可用作講清政策理念喎。
講番陳振彬呢個疑似人大參選人，當問及點樣喺換屆選舉中突圍而出，佢笑言要靠選委眼光，又自爆有區議會主席會幫手拉票，希望大家到時可以睇到佢過往做過嘅工作喎！
卓妮