政情：郭家麒錯「撤」「徹」底失敗
泛民主派成日同政府打對台，咩政策都淨係識要求「撤回！撤回！」作為中堅分子嘅公民黨近日再獻新猷，該黨立法會議員郭家麒竟然要求「撤」出調「查」沙田仁安醫院用地改建豪宅風波。吓？唔通身為醫生嘅郭家麒諗住大家都係同行，想放對方一馬？但其實原來只係手民之誤。
話說郭家麒前日拉隊到廉署總部，要求廉署介入調查仁安醫院將接近一半醫院地皮改建豪宅一事，但佢張請願橫額大大隻字寫住「要求廉署撤查事件」，搞到在場人士都睇到一頭霧水，心諗佢係想廉署「徹」查事件吖，定係「撤」出調查事件呢？就係因為寫錯咗個「撤」字，結果就鬧出笑話，變相將成個請願行動嘅立場倒轉。
其實郭醫生讀咁多書理應唔會寫錯字，但奉勸佢要睇實班議員助理，唔係就好似民建聯議員新丁「Tree根」鍾樹根咁，介紹自己係「People's Republic of Hong Kong」嘅「主法會」議員，咁就真係笑大人個口！