政情：黃碧雲陳家洛倒立會米
民主黨（白鴿黨）立法會議員黃碧雲上星期喺內務委員會上「一舊雲」投錯票，錯手否決由泛民主派提出就行會成員林奮強賣樓風波進行休會辯論嘅動議，之後因為再發生公文袋陳家洛喺長者生活津貼撥款終止待續投票上出問題，因而令議員關注點票系統係咪有事，要求秘書處徹查兼改善呢樣改善嗰樣。最離譜嘅係，秘書處因為咁而特別請人設計一套新系統，話可以即時睇到議員投咗乜嘢票喎，簡直係浪費時間同公帑。
尋日公文袋梁家傑喺內會重提林奮強休會辯論動議，今次一舊雲終於瞓醒唔再投錯票，通過動議喺今個月廿八日嘅大會上進行為時一個半小時嘅休會辯論。雖然一舊雲冇再擺烏龍，但由於上周先後兩次發生疑似投錯票事件，唔少議員懷疑係個投票系統出錯，要求秘書處徹查事件之餘，仲要求秘書處改善呢樣改善嗰樣，最爆笑係一舊雲問秘書處，可否喺顯示投票結果時寫埋議員個名出嚟，結果被其他議員恥笑。
無核對 自作孽
工聯會王國興就話，由於依家財務委員會經常要進行冗長記名表決，相信會對投票系統造成極大負荷。工黨何秀蘭就批評會議室燈光昏暗，要求主席喺公布結果前畀多少少時間啲議員睇吓自己有冇投錯票。其實何秀蘭已經點出投錯票問題癥結所在，就係議員投完票之後核對投票咪得囉，使乜搞咁多嘢呢，如果連自己都闊佬懶理，就算增設乜嘢先進系統都係嘥氣嘅啫。
最慘嘅係，秘書長陳維安（Kenneth）唔敢得失班尊貴嘅議員，雖然口講就話唔可以貿貿然進行改善工程，但原來喺投錯票事件發生後，秘書處已隨即新增咗部數據記錄器，記錄議員投票撳咗個咩掣，仲透露秘書處正研發一套新軟件，做好後可以即時更新議員投票結果，真係浪費時間同公帑。
民建聯蔣麗芸同黃定光就狂插陳家洛，話佢上次神志不清投錯票係因為食咗藥，仲話當時聞到陳家洛身上有酒味添。陳家洛即時嬲到飛起，大鬧對方無中生有兼抹黑，要求兩人公開道歉喎。