中環出更：楊華勇緊張做爸爸
廣東社團總會青委會一班兄弟姊妹日前齊歡聚，慶祝青委成立九周年，身為主任嘅康泰旅行社總經理黃進達（Jason）同晚會主委陳建豪（Conrad）搵埋友好團體嘅青委玩埋一份，中華廠商聯合會顏明潤、潮州商會葉振南、工業總會孫榮聰等青委主任拉大隊湊熱鬧。問佢哋做主任有乜心得？大家一致話唔一定要酒量好，但胸襟就一定要夠廣闊喎，唔怪得佢哋咁好感情喇。菁英會主席楊華勇（Johnny）都有去捧場，明年一月就做爸爸嘅佢坦言好緊張，睇書學湊B之餘，更加陪太太莊菲娜上孕婦課。Johnny話，太太首胎佗得好好，冇乜唔舒服，可能係keep住做孕婦瑜伽，鍛煉出好體格。問佢爸爸楊孫西有冇送番幾層豪宅畀孫女？Johnny笑而不答，但佢話爺爺一定會留番啲靚茅台酒畀孫女喎！
黃進達兩兄弟快做「老襯」
Jason弟弟黃進德快將娶老婆，會喺尖沙咀洲際酒店筵開四十幾席，佢仲預告自己都好事近，但就唔肯講婚期到底係幾時。Jason話，女友唔係做旅遊業，好少出遠門，反而佢已經去過好多地方，所以結婚之後度蜜月嘅地點都交畀女友任揀。
百樂門飲食集團太子爺李德歡（Tak）、黃大仙區議員丁志威（Roy）、廣東社團總會主席王國強公子王紹恆、立法會議員林健鋒公子林凱章都係青委副主任，當晚好落力招呼老友。Tak喺六兄弟姊妹中排第四，佢係唯一一個幫爸爸李國雄管理集團生意。今年做婚宴同百日宴勁旺場，Tak話集團未來會喺深水埗同火炭開新店。
卓妮