一水之隔，兩個世界。「濠江風景獨好」，澳豪派八千元福利加碼，再細看其紓困措施內容，豈止「派糖」咁簡單，認真照顧周到，扶貧固然到位，即使中產，如退稅、免首置印花稅、免稅額，都見到政府嘅細心；反觀香港，一項長者生活津貼，區區二千二百元，搞來搞去得政府宣傳片：如果快啲推行就好喇！長者嘅笑容與盼望，只得光和影，老朽見到都心酸！
朋友及親戚追問：一早叫你澳門置業，你又扭扭擰擰，目前睇怕連個車位都供唔起喇！如今有何感覺？
老朽無奈苦笑，想起內地作家劉震雲早前說莫言獲獎之後，城門失火殃及池魚，好多人問佢感受。劉震雲說：「這就像我哥娶了嫂子，洞房花燭夜，別人問我感覺怎麼樣。我說，祝他愉快。」
老朽此時心情，只能說，見到澳門人一年好過一年，開始相信世上真有「烏托邦」。老朽雖然內心吶喊：來生必做澳門人，此刻，洞房花燭夜，新郎不是我，酸溜溜之餘，也衷心祝賀澳門人及親朋戚友愉快！乾杯！
回歸十五年來，經建華無能治港、貪曾吹水亂港、振英新任未見「適度有為」，只忙於撲火，管治班子問題多多；政策急就章推出一項跪低一項！唉，咁搞落去，貧窮人口已近一百二十萬，六個港人一個貧窮，在職貧窮人口又接近六十萬新高！
梁振英政府再不拿點本事出來，這麼多窮人看不到出路，香港必轉型成「戾氣」社會、「躁爆」之城，相遇的只是各式各樣的噪音，這個城市唔死都谷爆！