政情：「精明消費者」劉燕卿退休
由格價專員做到消費者委員會總幹事嘅劉燕卿（Connie），今日正式退休。Connie尋日最後一次主持消委會《選擇月刊》記者會，佢由《選擇月刊》一九七四年創刊做到依家，屈指一算已有三十八年，可以話係睇住《選擇月刊》成長，感情自然深厚，消委會同事就特別喺記者會後向佢送上Goodbye Cake，上面仲刻有《選擇月刊》的朱古力牌仔添。
話說喺記者會後，消委會副主席何沛謙好鬼馬咁話有驚喜，Connie就好開心咁爆出一句：「係咪有雙糧呀？」點知原來係一盆「鮮花」，但Connie都話好感動，但最感動嘅都係收到一個Goodbye Cake。Connie最後臨別話當年，特別多謝傳媒風雨不改出席每月舉行嘅記者會，亦令《選擇月刊》成為搶手雜誌之一，佢勸勉廣大市民，要做個精明消費者。