女為悅己者容，男為悅己者窮，可想而知如果男方要為女方嘅美容費埋單，係幾咁昂貴嘅一件事。昂貴還昂貴，畀咗錢能夠變靚啲都話心甘命抵吖，萬一上錯賊船做老襯，畀咗錢居然美容變毀容，甚至命仔都冇埋，咁就冤哉枉也。
偏偏香港有好多整形春秋之凹凸容醫，整色整水整到客仔鬼五馬六。有個DR美容集團仲恐怖，啪完一支毒血針，女顧客竟然死咗。到底所謂嘅醫學美容有冇科學根據o架？你知啦，女為悅己者容有時真係愛靚唔愛命o架，如果冇科學根據，加上官老爺袖手旁觀，毒血針殺人事件恐怕陸續有來。
凹凸容醫事故頻仍，最近再有一間醫學美容中心懷疑有人非法行醫，衞生署聯同警方採取行動拘捕一男一女。之但係荒謬喎，衞生署聯同警方都守口如瓶，拒絕透露肇事美容中心嘅相關資料，店名又唔講，人名又唔講，連街名都秘而不宣。試問，莫非犯罪分子嘅私隱權，重要過良家婦女嘅知情權？如果有人盲摸摸接受非法療程，邊一條茂里負責呀？
好彩食衞局局長高永文似乎仲有少少血性，講到明傾向公布相關資料，衞生署先至開名透露，涉事美容院係旺角彌敦道嘅Medical Beauty Center，被捕男子係停牌醫生蕭定榮。
對於官老爺嘅做法，小市民梗係有意見啦。「東方報業民意調查」顯示，四成一受訪者認為醫學美容猶如無王管；三成表示醫學美容亂象不容忽視。至於衞生署最初拒絕透露肇事美容中心嘅相關資料，四成六受訪者批評當局罔顧消費者安全及利益；三成一指出公眾不知情難以提高警覺；一成五斥責當局知情不報係失職。
喂，凹凸容醫唔可以係庸醫o架，若然真係害人不淺嘅庸醫，官老爺冇理由維護佢哋私隱線，否則隨時有更多人受害。衞生署三緘其口玩神秘，當然要受到譴責啦。
近年美容服務投訴有上升趨勢，三成八受訪者批評當局一直對問題視而不見；三成一歸咎監管措施不合時宜；兩成四直斥當局懶執法令問題惡化。另外，五成八受訪者希望盡快立法規管；兩成六認為要加強打擊違規美容院；一成二覺得要加強罰則。
家陣美容業亂七八糟，市民要求政府好好監管係人之常情。早幾日功夫茶先至介紹過另一個古仔，有一位文職小姐接受過二氧化碳激光機療程之後，原本娟好嘅容貌搞到燒傷爛面。
總之，亂糟糟嘅凹凸容醫一旦遇上懶洋洋嘅衞生庸官，莫講話女顧客爛面啦，香港遲早毀容o架咋！