一直搞開最低工資嘅零售管理協會主席麥瑞琼，係人口政策督導委員會少數嚟自商界嘅委員，佢話主要係有啲公職任期就嚟滿，所以政府搵佢嘅時候，佢無乜考慮就應承加入。言下之意咪唔再做最低工資委員會呢？麥瑞琼就話低資會明年二月尾先任期完，依家講做唔做實在太早喇，但就話自己已做咗兩屆，頭尾做咗四年，真係漫漫長路，乜都夠。
至於社聯行政總裁方敏生，明明喺扶貧委員會籌備小組幫手重設扶委會同揀人選，結果籌備小組另外三名成員順利過渡，佢自己就去咗搞人口政策。方敏生最初唔肯講自己係咪唔做扶委會，但原來暗地裏已有分工，由政策研究及倡議業務總監蔡海偉做扶貧，咁就更加全面啦。