政情：陳茂波買「戀殖熊」中伏
發展局局長陳茂波（Paul）尋日出席明愛港島區賣物會主禮，仲喺賣物會巡咗一轉，買咗唔少嘢以表支持。點知買得興起之際竟然買咗隻「戀殖熊」。
事緣阿Paul高興買熊，畀完錢後，至發現手上熊仔心口貼住英國國旗，仲大大隻字寫住「I LOVE LONDON」（我愛倫敦），即刻面色一沉心知不妙，點知就被熱情嘅攤位職員拉住要求合照，盛情難卻，阿Paul惟有起勢撳住「戀殖熊」嘅心口，一影完相即秒速將熊仔塞畀新聞秘書放入袋，逃離現場衝咗去隔籬個中資銀行攤位，玩番轉遊戲，講番句普通話，得咗﹗咩罪疚感都無晒﹗
阿Paul前幾日喺立法會回應議員質詢時話，可以考慮以勾地表地皮興建公屋，佢尋日再補充，政府要先檢視總體土地供應再作決定，唔會不顧後果，側重一邊。
身為「明愛之友」嘅阿Paul尋日原本話講完幾句就走o架喇，點知轉頭又見佢喺會場流連忘返，唔通做完訪問要鬆一鬆？原來佢係同一眾明愛之友歎咖啡敍舊去。