中環出更：李鋈麟為朋友安康茹素
香港姓李嘅政商名流多不勝數，日前李氏宗親會就職，唔少得一班宗兄宗弟嚟撐場。擔任董事會主席嘅東華三院總理李鋈麟（Alan）滿場飛，卓妮發覺佢瘦咗一圈，步履輕盈，原來佢轉咗食齋近半年，已經瘦咗近二十磅，成個人恍如脫胎換骨，西裝都買細咗兩個碼。
轉食齋嘅因由，Alan話要由佢生日講起，半年前佢同老友大搞生日派對，飲到不亦樂乎，點知其後老友爆咗腦瘤危殆，嗰一刻錢同人面都買唔到朋友條命，惟有誠心祈求黃大仙，用食素一年嚟做交換條件。最後老友幸保性命，佢就遵守承諾至今，依家連搭飛機都會預先訂素食餐。
注資電視台做監製
宗親會一向予人「老餅」感覺，Alan話誓要進行大改革，佢笑言自己加入之後，已經將平均年齡大大降低，未來會致力吸納青年才俊加入，為宗親會注入活力。今年冬天凍得早，Alan做嘅皮草生意大升三成，豬籠入水。佢仲透露，近來注資經營電視台，打造「中國的CNN」，仲一嘗做監製嘅滋味。