中環出更：名人齊賀戴德豐孫仔百日宴
作風低調嘅全國政協常委兼四洲集團主席戴德豐（Stephen）最近家有喜事，佢嘅二仔戴進傑幫佢添咗名乖孫，取名戴承亨。首次升呢做爺爺嘅Stephen開心到飛起，上周四晚喺酒店為孫仔擺百日宴，邀請城中政商界好友齊去飲杯。打上領呔嘅BB仔面圓圓，好得意，三爺孫成個餅印咁，難怪Stephen一講起個孫，就笑到見牙唔見眼。
當晚去飲嘅有福建社團僑領楊孫西、洪祖杭及林樹哲，仲有前教育局局長孫明揚夫婦、廣東社團總會主席王國強（KK）、「玩具大王」蔡志明夫婦、愛沙尼亞共和國駐港名譽領事林建康夫婦、太子珠寶主席鄧鉅明夫婦等人，氣氛好熱鬧。
全家為添新成員開心
卓妮問Stephen有冇送層樓畀乖孫，佢淨係笑笑口話，送咗好多嘢畀乖孫，包括心形金器。榮升爸爸嘅戴進傑就話，BB個名係大家一齊諗出來，家中添個新成員，個個都好開心。有「零食天王」稱號嘅Stephen，又有個花名叫「卡樂B大王」，呢個咁得意嘅BB為戴家帶來咁多歡樂，叫佢做「卡樂B」都好啱聽噃！
今年城中名門排隊迎接龍B，已有一名孫女嘅王國強都好開心話，大仔王紹基嘅太太快將幫王家添多名孫仔，已知係男孫，王家三年抱兩真開心。
卓妮