政情:傳陳幼南代方文雄選人大

港區人大代表選舉仲有個多月就舉行,香港中華總商會陣前易將,已經備選咗成三個月、工作廣獲好評嘅中總副會長方文雄(David)忽然棄選,盛傳改由另一中總副會長、潮屬社團總會主席陳幼南披甲上陣,令唔少親中人士感意外。

須知今次已經唔係方文雄第一次棄選。之前中總成功踢走「立會懶蟲」黃宜弘後,本身為協成行董事總經理嘅David,亦被指係大熱接棒人選,認為佢出選將有助中總走向年輕化,但最後卻改由大律師廖長城出戰,並喺無對手下自動當選立法會議員。事隔不足一年,David第二度棄選,到底有乜玄機呢?有人就估計佢其實係以退為進,等多幾年「坐正」做中總會長後,再轉為爭取做全國政協委員。

David接受本報查詢時證實棄選,主因係低估選舉難度與時間分配問題喎。陳幼南則對出選港區人大一事不作評論。

第一手消息請下載on.cc東方互動iPhone/iPad/Android/Windows Phone Apps