政情:立會電子儀器「大罷工」

立法會新大樓尋日發生疑似封咪事件,話說大約三點半鐘,內務委員會正討論應唔應該成立退休保障小組委員會,正當民主黨胡志偉準備開口講嘢時,成個會議室入面啲咪突然全部壞晒,要靠秘書處送上無線咪,但個無線咪又因接收欠佳而發出怪聲,搞到大家聽唔到佢講乜。

當所有議員發表意見後,內會主席梁君彥(Andrew)隨即要求響鐘五分鐘叫議員返入會議室投票,但明明計時倒數投票,投票鐘又唔知點解失靈唔響。之後當Andrew宣布開始投票,所有議員都伸手撳掣時,佢哋又發現連個投票掣都壞埋,一眾既講唔到嘢又投唔到票嘅議員惟有無奈得啖笑。

當機立斷嘅Andrew見到咁嘅情況,即刻叫議員舉手等秘書處職員叫名數人頭,點知個女職員竟然叫錯人民力量陳志全做「何志全」,又唔記得漁農界何俊賢個名,要靠Andrew出手指正。立法會入伙咁耐仲係乜都壞,相信都係當初貪曾為一己私欲而要立法會趕入伙所累。

第一手消息請下載on.cc東方互動iPhone/iPad/Android/Windows Phone Apps