中環出更：CY笑談97移民潮

CY致詞時以講笑形式提到回歸前嘅移民潮，話九七年前唔少人對回歸感到悲觀，大量港人移民海外，唔少人對回歸都有誇張及悲觀嘅看法，最令佢印象深刻嘅一個笑話，就係有人話回歸後香港將空無一人，屆時啟德機場會貼出一張告示，提醒最後一位離開嘅港人要熄燈慳電，亦有市民擔心九七後到街上買麵包，唔知應該用人民幣定係港幣。

政商名人 解構軟實力

CY強調，香港已經順利過渡，人權自由法治等核心價值得以維持，依家年輕人可到內地發展，更加海闊天空。

施榮忻（左）首次揸咪做主持，準備定貓紙應急。右為講者之一嘅立法會議員李慧琼。	雖然呂慶耀（左）同洪為民出身不同，但一樣係事業有成嘅才俊。（嚴少阡攝）	項明生希望政府加大力度，協助港青提升軟實力。

講者之一嘅著名建築師呂元祥公子呂慶耀話，唔少人都覺得作為富二代，做事都容易啲，但佢就絕不認同，佢話自己二十幾歲就隻身返內地創立建築師樓，一樣要捱要搏。佢覺得每一個生命、每一個行為都係一個品牌，年輕人應該反省自己每日做過啲乜嘢事，將來嘅定位放喺邊，日積月累下，自然會有軟實力。

同場嘅Sony Computer Entertainment香港董事項明生（James）就話，靠自己提升軟實力並唔足夠。James剛剛去完韓國睇紅葉，點知酒店、景點都逼滿遊客，事關韓劇帶旺景點，一隻《江南Style》仲令到韓國音樂文化風靡全球。原來韓國政府好着重市民嘅藝術培訓，規定全國電視劇要有四分之一播韓劇，作曲編舞都要有專人指導，所以政府喺背後推動係好重要嘅。

施榮忻搵「貓紙」傍身

行政會議成員陳智思都有發表演講，佢話年輕人要提升軟實力，就要累積唔同嘅經歷，以增加將來面對逆境嘅能力。至於Jaime今次就「處男下海」做主持，與一班青年領袖對話，佢笑言自己畀人訪問就多，今次訪問人都幾緊張，已經準備好「貓紙」應急。佢仲話，之前畀囡囡傳染咗大感冒，病到鼻紅兼聲沙，好彩仲開到聲。

卓妮