盂蘭節已過咗，萬聖節又未到，點解中環會出現吸血鬼嘅呢？仲要係日光日白猛鬼出籠，竟然冇人用十字架同桃木劍斬妖除魔。睇真啲，原來嗰隻吸血鬼係人扮嘅，目的係諷刺港鐵漠視社會責任，吸盡市民血汗錢。
成件事其實係咁，港鐵尋日喺中環舉辦競步賽，關注公共交通事務聯盟等等民間團體乘機到場請願，批評港鐵過去三年擁有龐大盈餘，賺到肚滿腸肥仍然按照可加可減機制不斷加價，要求政府重新提出檢討方案。請願人士手持大氣球高叫口號，形容港鐵係面目猙獰嘅吸血鬼，促請延長票價調整機制諮詢期，凍結可加可減機制。
既然有人踩場搞對抗，港鐵主席錢果豐當然走唔甩，點都要回應幾句啦。錢主席就話嘞，票價機制必須簡單易明，唔可以太複雜，要市民覺得公平公道，港鐵會聆聽各方面及專家意見，希望結果得到持份者接受同滿意。
功夫茶有少少懷疑，港鐵舉辦嘅唔係一步一腳印嘅競步賽，而係四両撥千斤嘅太極賽，因為錢果豐嘅說話內容十足十耍太極，耍到你一頭霧水唔知佢噏乜。
同場嘅運輸及房屋局局長張炳良都有講嘢o架，不過亦係耍太極咁解囉。佢話喎，港鐵票價可加可減機制嘅檢討已進行一段時間，社會有不同意見，包括機制應加入計算市民負擔能力嘅因素、港鐵盈利同服務表現，當局要考慮可行性，現時諮詢已延長至下月中，立法會交通事務委員會將再開會討論。
如果票價機制真係要同服務表現掛鈎，唔使廢話連篇啦，港鐵莫講話冇資格加價，直情要減價添呀。喂，港鐵服務質素之低路人皆見，動不動都故障。冇耐前之嘛，上午繁忙時段三條市區路線包括荃灣線、觀塘線以及港島線全部跪低，死因係車務控制中心顯示系統冇電力供應，導致三條路線列車班次延遲。繁忙時段港鐵跪低好大劑o架，上班一族滯留月台，萬一因為返工遲到而被老闆炒魷魚，仔細老婆嫩唔通港鐵負責養咩！
除咗列車服務經常延遲之外，講咗N咁多年嘅月台幕門亦係遲遲未安裝完畢，東鐵線要到二○二○年先至有幕門可用，唔想跌落路軌死得冤哉枉也？再耐心呆等八年啦，香港人！
講真，商業社會求財係無可厚非嘅，問題係牟利唔好牟得太賤吖嘛。港鐵上半年盈利五十八億六千一百萬元，舊年仲勁呀，狂賺一百四十七億元。所以民間團體嘅訴求有道理o架，票價唔應該只加不減。
唔該張炳良，麻煩錢果豐，唔好再做吸血鬼，否則功夫茶不排除出動十字架同桃木劍o架！