政情：政府狗仔隊用板腦「捉」議員
立法會議員開會經常行出行入坐唔定，如果遇上表決重大政策，就要依靠各政策局嘅政務官化身成「狗仔隊」，駐守會議室各大出入口，(目及)實各議員嘅一舉一動，務求一票都走唔甩。唔知係咪啲議員樣貌太似好難認，狗仔隊多數要攞住張印有議員樣貌嘅貓紙逐個比對，再用電話即時通知控制中心數票。不過，尋日我哋就發現班狗仔隊升呢利用平板電腦數議員人頭箍票。
財務委員會尋日審議長者生活津貼計劃，有議員提出中止待續議案要求押後審批撥款申請。有狗仔隊就企喺會議室外先用「人頭貓紙」認議員，然後再喺部平板電腦上面篤嚟篤去，似乎係想將第一手消息通報畀局方，等佢哋知道啲議員去咗邊。不過，既然用得平板電腦，點解仲要咁唔環保嘥紙去列印啲「人頭貓紙」認議員呢？再者，作為政府精英嘅政務官，莫非要記住七十個議員樣貌都咁困難？