政情：蔡冠深為樓盤改個靚名
俗語話「至怕改壞名」，樓盤都一樣，若然改到個好名，對銷情都大有幫助。尋日中華總商會會長蔡冠深（Jonathan）出席該會一個活動時，講起佢公司新華集團喺天津國際金融中心新開嘅樓盤，叫做「公館1882」，「公館」嘅稱謂非常古雅，1882則是天津金融界崛起嘅年份。
除咗喺天津，Jonathan透露，中總將會喺珠海橫琴興建中總大廈，加強兩地經貿協作，珠海市政府仲委任咗佢做珠海市經濟顧問添。中總下月換屆，聽聞副會長楊釗係下屆會長大熱之選，尋日唔少人都預先恭喜佢，佢雖然婉轉話「都仲未選」，但笑意盈盈，答案經已呼之欲出。
尋晚特首梁振英（CY）喺跑馬地馬場宴請中總一班高層，財爺曾俊華、特首辦主任邱騰華、商務及經濟發展局局長蘇錦樑都有出席，今次係CY因為諮詢施政報告意見，第三度宴請有代表性嘅商會。