政情:慢必等葉劉做媒人

人民力量嘅同志議員陳志全(慢必)昨出席一個同志活動時大爆,新民黨主席葉劉淑儀自稱黨內有好多同事係「攣」嘅,葉劉仲化身「媒人」話介紹其中一個男同事畀慢必識添。但到依家都未有下文,事關始終都要睇吓係咪合眼緣,慢必笑言,可能叫助手幫手睇吓個男仔係咩樣,或者影張相「過過目」先喎。

多個同志團體將於下月十日舉行同志大遊行,爭取同性戀者喺工作環境不受歧視同擁有相同待遇,大會預計有三千人參與,仲呼籲參加者當日穿着代表不同職業嘅服飾。慢必將會擔任活動大使,呢次將會係佢喺香港第一次參加同志遊行,佢以前嘅男朋友因為怕畀人知道係同志身份,所以佢一直冇參與。

單身嘅慢必又話,自從「出櫃」後,議會同事都對佢好客氣。對於早前葉劉喺一個座談會上,被問到其背景好「紅」時,葉劉則指自己最多都係好似慢必嘅粉紅,慢必就話唔覺得有人將佢嘅性取向擺上枱,相信有關言論都係出於友善,估唔到慢必嘅量度都有番咁上下喎。

第一手消息請下載on.cc東方互動iPhone/iPad/Android/Windows Phone Apps