中環出更:何喜華眼濕濕 獲榮譽院士很感動

嶺南大學尋日頒授榮譽院士予四位社會知名人士,包括社區組織協會主任何喜華、工商專業聯會主席黃友嘉(David)、上海商業銀行董事長榮智權(Lincoln)及新加坡華僑銀行行政總裁錢乃驥。何喜華坦言首次獲得咁高榮譽,差啲感動到喊,皆因佢細個時唔讀書又反叛,雖出身富裕嘅玉石商人世家,但唔肯繼承家族生意,一直冇諗過有今日嘅成就。佢笑言媽媽受佢感染,非常留意身邊時事,經常聽收音機、睇新聞,有時仲會考番佢轉頭添!

何喜華話,雖然母親已屆高齡,仍熱心公益,不時動員身邊人捐出舊衣物回收,搞到佢個寫字樓變咗做雜物房。至於何喜華最遺憾嘅,係年前仙遊嘅父親,臨終前一刻都未完全認同佢做社會工作。何喜華嘅妹妹何慕清係兒科醫生,尋日都有出席支持哥哥,何喜華就話妹妹盡力做好醫生嘅工作,已經係造福人群。何喜華出咗名係支持特首梁振英嘅「梁粉」,對於新政府嘅工作,何喜華話有好大期望,佢話上屆政府留下住屋不足、貧窮、社會矛盾等嚴峻問題,冰封三尺非一日之寒,佢相信梁振英會努力解決呢啲社會不公平及深層次矛盾。

廠商會墟冚撐黃友嘉

David都係首次獲頒榮譽院士,中華廠商聯合會會長施榮懷、副會長吳永嘉、林大輝等廿幾個兄弟姊妹齊捧場,佢哋仲即場用手機拍片、影相,場面好墟冚。未攞過榮譽院士嘅林大輝一見到David,就話要贈佢六個字,就係「既羨慕又妒忌」,恨到出晒面。近日盛傳David積極備戰競逐港區人大代表,佢尋日就大方承認有此想法,不過現階段仍要探吓風、試吓水溫喎。

卓妮

第一手消息請下載on.cc東方互動iPhone/iPad/Android/Windows Phone Apps