中環出更：胡楚南唔睇話劇唔安樂
話劇題材緊貼時事，令觀眾會心微笑，唔少名人都鍾意睇。「K金大王」胡良利（萬益）珠寶董事長胡楚南係香港話劇團嘅忠實粉絲，佢多年前已經同藝術結下不解緣，佢年前因擔任香港舞蹈總會會長，仲撮合咗佢公子胡智聰同舞蹈員出身嘅新抱王凱曼（Carmen）嘅一段姻緣添。
胡楚南近月積極資助話劇團發展基金，支持其外展教育，日前仲掏荷包答謝話劇團及舞蹈團一眾成員。胡楚南笑言，初初只愛睇舞蹈，點知有次贊助話劇《有飯自然香》，自此睇少一套都唔安樂，好似早排喺香港上演嘅《我和秋天有個約會》，佢因為身在他方而錯過咗，但遲啲會去台灣補番數。
內地經濟放緩，唔少珠寶行都話今年黃金周生意大跌，不過胡楚南就話佢盤生意不跌反微升，秘訣在於尋找新客源，好似中東、阿根廷、緬甸、柬埔寨、越南等地都有商機。佢仲話，保持貨品款式新、服務好，都係吸客嘅必殺技。
蒙德揚攞「最佳睇劇獎」
話劇團理事會主席胡偉民及擔任副主席嘅信興集團副主席蒙德揚（David）都係話劇發燒友，不過David原來並非天生愛話劇，佢話初初對話劇一無所知，有次朋友拉佢入理事會，佢就嘗試去欣賞話劇，點知愈睇愈上癮，依家一套話劇可以睇三次，笑言可以攞「最佳睇劇獎」。香港足球總會副主席貝鈞奇贊助話劇《頂頭鎚》，講起香港足球業，佢就大呻難做，事關足球隊是非多、經費大、觀眾少，惟擁有一顆對足球嘅熱心，令佢繼續做落去。
卓妮