中環出更：李秀恒女兒油畫具諷刺力
致力培育青年藝術工作者嘅賽馬會鯉魚門創意館，尋日隆重對外推介「青苗計劃」首位新畫家，就係現仍就讀香港大學藝術系三年級、中華廠商聯合會副會長李秀恒女兒李楚洳（Samantha）。Samantha擅長以黑白相片做畫布，然後繪上反諷社會萬象嘅油畫，無論色彩或構圖意念，都具備威力十足嘅衝撞效果，難怪畫壇前輩兼老師巢錫雄都盛讚小妮子潛力無限。
Samantha話，受到爸爸熱愛攝影嘅影響，佢都鍾意趁旅行時帶埋長短鏡去影相，去年暑假全家人去肯亞睇動物大遷徙，每日嘅行程就係坐喺架車度，喺車頂天窗伸出長鏡頭捕捉動物一舉一動，就係今次旅程，令佢興起以動物為主題嘅「P ON P （Painting on Photo）」創作。佢創作嘅逾九十幅「相中畫」，將喺下月二日香港大會堂展出，同場仲有創意館駐場藝術家劉偉基及司徒建嘅陶瓷作品。
鯉魚門創意館現址係多年前被殺校嘅海濱學校，後來九龍社團聯會社會服務基金向政府承租，將校舍活化為藝術文化推廣平台。