政府新聞處早前搬入位於上環嘅海港政府大樓，未來嘅記招等活動都會移師新址舉行，尋日就宴請傳媒食「咖喱餐」，兼參觀新址嘅無敵大海景。其實「咖喱餐」不時都有神秘嘉賓「彈出」，今次大家去到早已做好心理準備，而今次彈出嘅就係新特首梁振英（CY）。
CY尋日同特首辦一眾職員出現，話想見吓啲前線記者，不過CY就只係食咗一碟食物，仲講笑話自己「環保慳油」，而在座各人亦生怕會製造廚餘唔敢多取食物，好彩最後由特首辦主任邱騰華打破僵局，孖埋新聞統籌專員鄧惠鈞（June Teng）帶頭出去攞食物，眾人先開始陸續攞多一轉。
至於新聞處新址嘅落地玻璃無敵海景有幾勁，而CY同前線記者交流又有幾「全接觸」？唔好意思呀，尋日嘅活動按「咖喱餐」嘅傳統，係不准錄影同攝影o架，但新聞處就有攝影哥哥好勤力咁四圍影相做紀錄，而且只限新聞處內部用途，各位讀者就無緣見證喇！