政情：熱愛旅遊 羅啟妍最愛敦煌
灣仔會展中心尋日舉行年度藝術盛事Fine Art Asia2012，著名華人珠寶設計師羅啟妍都有搞展覽。熱愛旅遊嘅羅啟妍話，幾年前到中東旅遊，無意中發現敍利亞一間大教堂嘅牆壁上，竟然刻有好多中國傳統嘅佛教圖案，好似有啲繩結嘅設計，喺中國戰國時代已經存在，令佢驚為天人。原來現代好流行嘅「全球一體化」，喺遠古時代經已出現。
羅啟妍又話，眾多旅遊景點之中，佢最鍾意去甘肅敦煌，事關位處絲綢之路上，有四千幾年歷史，藏有唔少珍貴嘅佛教藝術。佢好惋惜話，由於莫高窟長年開放予遊客觀光，窟內嘅雕塑同牆畫已經受到損耗，再咁落去，不久就會消失於世上。所以佢早前與國學大師饒宗頤及一班志同道合嘅好友，共同發起成立「香港敦煌之友」，籌募經費用以將莫高窟數碼化，讓敦煌千古文化得以保存，傳承到下一代。