政情:大舊阿Paul復會前探親旅遊

新一屆立法會復會在即,好多候任議員都趁機外遊休息充電,其中人民力量陳偉業(大舊)就外遊兼念親恩,眼見多年都冇同媽媽共度中秋,所以專程到加拿大同媽媽過節慶團圓,認真孝心。至於今年成功轉戰地區直選嘅謝偉俊(Paul),早前就同朋友去咗桂林陽朔玩四日,欣賞當地嘅湖光山色。

大舊過去一直喺議會進行激烈抗爭,但其實佢都有鐵漢柔情嘅一面。大舊喺社交網站上載同媽媽喺加拿大嘅合照,佢感嘆話已經多年冇同媽媽共度中秋,好多網友都對大舊出外充電不忙頌親恩讚好,更有網友幫口話,希望大舊嘅媽媽明白大舊嘅無奈,並祝福佢哋盡情享受天倫之樂喎。

除咗大舊之外,阿Paul早前就同朋友去咗桂林陽朔玩。阿Paul話,其實今次並非首次到桂林旅行,由於當地風景太靚,加上有十年前已到當地做生意嘅港人十分好客,所以決定到當地盡情休息,之後返港再搏殺過。

第一手消息請下載on.cc東方互動iPhone/iPad/Android/Windows Phone Apps