政情：工聯三老做學神
工聯會喺立法會選舉贏得六席，算係建制派第二大政團，而該會六位議員之中，有三位年齡已經係六字頭兼經驗豐富嘅老將，另外三位就係三十幾四十歲嘅議會新血，理論上經驗同活力俱備，係一個唔錯嘅配搭。不過，老嫩配搭都產生代溝問題，據聞三位新丁近日同幾位前輩開會時，就反覆要求對方要用多啲資訊科技產品，方便溝通及處理文件，但前輩似乎有啲抗拒，呢個議題分分鐘引發新、舊人之間嘅角力戰都未定。
資訊科技產品日新月異，年輕一代已經習慣咗用呢啲產品去工作同溝通交流，智能電話、平板電腦等，更加係一班政壇新人類賴以「生存」嘅工具。有咗呢啲產品，工作上的確又係方便好多嘅，但並唔係所有政治人都適應，好似工聯會三位資深議員，包括「超級區議員」陳婉嫻（嫻姐）、黃國健（KK）及三屆議員王國興，據講佢哋唔係咁常用啲資訊科技產品，至今仍然習慣印晒啲文件出嚟，逐張逐張咁慢慢睇。
王國興板腦買嚟擺
據講有次工聯會開會時，某位老將投訴收唔到文件，班職員登時嚇一嚇，心諗冇理由吖，明明一早發晒電郵畀咁多人o架，急不及待翻查紀錄，最終調查發現係嗰位老將冇睇電郵囉。又有一次開會，班後生開完會後，夾埋一齊力勸王國興買部平板電腦，皆因睇文件可以放大縮細，兼且唔使用咁多紙張。據聞王國興聽咗十幾分鐘後，終於施施然答話：「我有買o架，不過擺喺屋企之嘛！」即係冇用囉。
所謂「家有一老，如有一寶」，工聯會今屆有三個活寶貝，好多政團羨慕都嚟唔切。老將有嘅係經驗，新血就活力充沛，但話晒年紀相差十幾廿年，價值觀同習慣實有出入，使用資訊科技產品就係最佳例子，睇嚟六位新舊議員未來仍然要一段時間磨合及互補不足。此外，據講工聯會已經安排咗新任勞工界議員郭偉強，負責該會以往甚少接觸嘅環保政策，預料未來該會工作將會更加忙碌，睇嚟都係時候將工作全面資訊科技化喇。