政情：沈祖堯唱Moon River悼歌王
為咗慶祝中秋佳節，香港中文大學校長沈祖堯上星期五，同校內約六百名教職員喺崇基學院眾志堂處聚咗一個下晝。呢個活動每年都有，自從沈校長上任之後，中大每逢中秋節都會舉辦個聯歡會，畀校內啲高層同教職員聯絡吓感情，過一個愉快嘅下午。所以今次呢個中秋聯歡聚會已經係第三年舉辦。
雖然聯歡會喺下晝舉行，仲未有月亮，但係會上除咗有校內高層表演唱歌、魔術，同埋設有攤位遊戲之外，仲有沈校長同校內教職員演唱跟月亮有關嘅名曲。前兩年，沈校長就分別演唱咗《月亮代表我的心》，同埋《但願人長久》，呢兩首都係中文名曲，但今年就一改傳統，同佢班同事一齊唱咗首英文歌《Moon River》。講開《Moon River》，唱過呢首歌嘅「抒情歌王」Andy Williams才過身冇耐，沈校長揀呢個時候唱呢首歌，莫非係想順便懷念吓呢位歌王？