政情：鄭泳舜孖「債主」旅遊甜蜜蜜
繼去年底區議會選舉後，接二連三舉行咗特首選舉同立法會選舉，鄭泳舜（Vincent）身為民建聯深水埗區議員，又係該黨嘅中央委員會委員，而且仲有份參與區議會同立法會選舉，自然會好忙。所以佢喺選舉結束後，第一件做嘅事，就係抽時間陪屋企人補數。不過，隨住立法會即將復會，Vincent話佢啲地區工作都要回復正軌，以支持候任議員蔣麗芸嘅工作喎。
Vincent日前剛同太太去完南韓首爾旅行返港，佢話自從囝囝出世後，都冇同太太過二人世界，賒落啲數要趁選舉完後還債，入返啲錢去銀行喎。又賒數又清數，真係聽到一頭霧水，原來Vincent所講嘅其實係陪太太嘅時間，同埋畀太太嘅愛。佢話，安排四日嘅首爾旅程都係為咗畀番啲愛老婆喎，相信鄭太聽到一定心都甜晒啦！至於三個囝囝，Vincent就話放低咗畀父母同外父、外母輪流湊，所以話家有一老如有一寶係冇錯嘅。