政情：星爺 張宇人 誓趕卿姐
立法會各委員會搶位戰逐漸明朗化，擁有壓倒性優勢嘅建制派肯定會取得大會及內務委員會兩個主席位，至於同樣重要嘅財務委員會主席一職，亦已經協調成功，由金融界候任議員吳亮星（星爺）同自由黨飲食界議員張宇人（Tommy）輪流做主席，誓要攜手趕絕有意爭做主席嘅民主黨劉慧卿。雖然如意算盤係就係咁打，但事實存在暗湧，據聞有唔少建制派中人對Tommy有意見，一個唔覺意又玩叛變轉投卿姐的話，主席之位就雙手奉送畀泛民主派。
建制派過去連續幾年失落財委會主席寶座，須知道立法會權力有限，最有機會影響到政府施政嘅就係審批撥款之時，財委會主宰呢項僅有影響到政府決策嘅權力，主席位置自然成為兵家必爭之地。雖然建制派議員人數一直佔優，但由於選舉主席係投暗票嘅關係，過去每每到重要時刻，都會忽然出現「二五仔」倒戈，投票畀泛民，結果造就卿姐過去幾年一直領導群雄。
兩人梅花間竹式輪任
為咗重奪財委會主席一職，兩位有意過主席癮嘅建制派議員，即係星爺同Tommy終於化干戈為玉帛，據講兩人為咗唔想分散票源令卿姐得益，近日已經傾掂數，初步決定由Tommy先做主席，兩人再以梅花間竹形式輪任，由於會期只有四年，故兩人理論上可以各做兩年。
想就係咁想，但世事無絕對，尤其涉及Tommy呢位惹火尤物，情況就更為複雜。Tommy喺飲食界確係出晒名，但喺建制派內部就人緣麻麻，同一眾建制派勞工界代表喺勞工或最低工資問題上都有「牙齒印」，加上自由黨嘅死敵經濟動力，呢批所謂嘅「盟友」投票時又會否全力支持佢，實在好難講。到底Tommy同星爺嘅計劃會唔會滑鐵盧？建制派叛變嘅情況又會唔會再重演？到時真係要金睛火眼睇實至得喇！