中環出更：名人攜眷捧名指揮家場
蜚聲國際嘅指揮家梵志登（Jaap van Zweden），前日坐正香港管弦樂團音樂總監，並演出就職以來首場音樂會，吸引不少社會名人攜眷捧場欣賞，包括著名小提琴家西崎崇子及夫婿Klaus Heymann、廉政專員白韞六夫婦、政制及內地事務局局長譚志源夫婦、大新銀行主席王守業夫人等，衣香鬢影。
音樂會獲得新華集團連續第五年冠名贊助，身兼中華總商會會長嘅集團主席蔡冠深（Jonathan）同擔任港樂籌款委員會主席嘅太太蔡關穎琴（Janice）滿場飛招呼賓客，除咗身在瀋陽打理家族生意嘅大仔Johnson外，二女頌思（Jocelyn）及三個兒子就化身公關，落力幫手為活動打點。
蔡冠深鍛煉女兒獨立
唔經唔覺，Jocelyn已經亭亭玉立，表現得落落大方。身為末代高考生嘅Jocelyn好開心話，依家入讀咗中文大學英文系，皆因英語係佢嘅興趣兼強項。不過，一講到返學放學，Jocelyn就輕嘆一聲，事關佢家住中環半山區，返中大已經長途跋涉，點知近日屋企附近進行修路工程，搞到足足兩個鐘先返到中大，來回就要四個鐘。
本來Jocelyn想申請大學宿位，點知今年雙學年，收生數目多咗近一倍，所以申請唔到喎。咁點解佢唔叫爸爸搵司機接送呢？Jocelyn就笑言，爸爸想鍛煉佢嘅獨立性，要抵得住刻苦喎，真係用心良苦。
