民主黨（白鴿黨）喺立法會選舉大敗，輸剩六個議席，幾個舊人好似黃成智、李永達都被叮走，取而代之就係兩位全無議會經驗嘅新丁。好似排隊多年終於上位嘅新丁胡志偉，入到議會就要身兼多職，負責立法會幾個唔同範疇嘅委員會，連佢自己都嗌晒救命，擔心做議員後會忙到搞唔掂，叫大家有咩事都對佢手下留情咁話。估唔到堂堂一個泛民大黨，搞到依家揦手唔成勢。
白鴿黨舊人走剩三個，最多補番個半舊人單仲偕，確係江郎才盡，搞到新丁胡志偉及黃碧雲入到議會要孭重飛。好似黃碧雲咁，嚟緊就會擔任該黨嘅教育、環境及食物安全政策範疇嘅發言人，仲有傳佢可能要做埋黨主席。至於胡志偉就要做民政、房屋及交通政策範疇嘅發言人，而且兩人都要另外孭多三個範疇嘅副發言人職務，胡志偉更可能會執埋文化事務，到時真係做到氣咳。