政情：孔孟引領方潤華人生路
一向重視教育事業嘅協成行集團主席方潤華，尋日再以其基金名義，捐贈一尊三點三米高嘅孔子銅像予香港教育學院。尋日方潤華喺揭幕儀式上大爆少年往事，佢話自細就好奀皮，讀書成績好差，差到連爸爸都話佢無藥可救，於是安排佢入讀私塾兩年，學習孔孟學說，於是乎令佢嘅人生重回正軌，先至有今時今日喺商界嘅超然地位。
方潤華話，佢之所以咁熱心教育，係因為當年佢喺英皇書院讀中學期間遇上日軍侵華，令佢無法完成中學，更加失去讀大學嘅機會，內心好痛苦。當時佢就同爸爸講，有朝一日賺到錢，一定會畀年輕人讀到大學，呢一個承諾，一直保存喺佢哋兩父子心中。
唔少善長仁翁都將捐款集中放喺名牌大專院校上，方潤華就希望有錢人都應該重視教院。講番呢尊孔子銅像，係方潤華喺香港豎立嘅第二尊銅像，第一尊位於公開大學，讓萬世師表嘅精神及思想喺校園薪火相傳。