中環出更：吳文華行勻立會告別
立法會秘書長吳文華（Pauline）尋日最後一日返工，新秘書長陳維安（Kenneth）今日正式上任。臨別依依，Pauline大嘆最唔捨得一班共事多年嘅同事，所以尋日就行勻成個立法會同一眾議員及職員道別，以便答謝佢哋多年嘅照顧。
即飛西安睇兵馬俑
佢之後喺五樓咖啡閣食完最鍾意嘅公仔麵餐之後，下晝就去咗美利大廈同翻譯組大約一百位職員告別。Pauline尋日一身紫色中式旗袍，異常風騷話自己終於可以放假抖抖，又透露自己連行李都攞埋返立法會，事關佢尋晚七點幾已經搭飛機去北京，會合其他團友之後再轉搭內陸機去西安睇兵馬俑。
Pauline笑住話咁大個女都未見過兵馬俑，又話到時一定會食盡地道美食，擔心返港後會脹咗幾個碼喎。
雖然Pauline已經離開立法會，但佢仍然放唔低呢個陪咗佢廿幾年嘅地方，所以打算喺新議員宣誓當日，坐定定喺公眾席視察首日開會情況，確保Kenneth做嘢萬無一失喎。
卓妮