候任立法會建築、測量及都市規劃界議員謝偉銓（Tony）外表似位好好先生，接納激進嘅程度理應比其他人高，所以當初建制派要編配會議廳座位時，就好自然咁將Tony編喺新民黨副主席田北辰同社民連梁國雄（長毛）之間，諗住以佢和善嘅性格應該可以平息所有干戈。
正當所有人以為Tony願意犧牲小我坐喺長毛隔籬、忍受高聲喊口號時，根據秘書處尋日派發嘅議事廳座位表，原來Tony已經靜靜雞咁同民建聯曾鈺成調咗位，搬咗去會議廳嘅最右邊、即勞聯潘兆平隔籬個位，擺明係想避開長毛，費事長毛嘅不定期發難引致誤中副車就唔好啦。
之前傳聞Tony會加入三散人行列成為四散人，但由新座位表所見，Tony依家反而同工聯會經濟動力比較親近，唔知佢會唔會捨散人，而取經濟動力呢？
由於Tony依家去咗新疆考察，所以我哋未能向佢求證事件嘅來龍去脈，睇嚟真係要等佢返港先至有分曉喇。