政情：黃成智報警話慢必誨淫
民主黨黃成智喺剛過去嘅立法會選舉中落敗，相反佢嘅「死敵」人民力量陳志全（慢必），就成功喺新界東當選。雖然選舉告一段落，卻餘波未了，黃成智尋日陪同兩位愛護家庭家長協會嘅成員去警署報案，話慢必作為行政總裁嘅香港人網涉嫌發布色情資訊，有可能違法，要求警方徹查。
黃成智強調，自己唔係針對慢必，事件亦同選舉無關，佢喺選舉過後收到家長組織投訴先會協助處理。佢重申，選舉時根本唔知個網有呢類偷拍、甚至強姦嘅內容，諮詢過法律意見後，認為事態嚴重，所以先會陪同家長組織報警。
慢必就回應話，覺得呢類指控好奇怪，皆因網上唔少討論區都有所謂嘅「成人區」，加上內容均由網民提供，唔明對方點解會針對佢。
慢必透露，十月前會辭去香港人網行政總裁一職，專心立法會工作。問到佢覺唔覺黃成智係唔忿輸時，慢必笑笑口答話：「你咁問到，我會話係囉！」