政情：候任議員誓詞綵排有彈有讚
立法會秘書處尋日為一眾候任立法會議員簡介首次大會嘅宣誓程序同注意事項，雖然宣誓事關重大，但都係得廿二位議員出席。秘書處特別抽咗四位議員練習走位同試吓宣讀誓詞，當中以工程界盧偉國（WK）排練得最似樣，大聲宣讀誓詞之餘又不時望向現場議員觀眾。WK話，佢自小就鍾意踏台板唱粵曲，所以少少嘢難唔到佢喎。
民建聯蔣麗芸（Ann姐）同航運交通界代表易志明兩人嘅表現就不過不失，除咗全程睇住張紙宣讀外，稍嫌同觀眾欠缺眼神接觸。不過，同佢哋相比之下，旅遊界姚思榮嘅表現就有啲遜色，佢喺綵排讀誓詞時頻頻食螺絲，緊張到連咬字都唔係咁清楚。佢話第一次企喺議事廳有啲緊張，返到屋企會勤加練習。
坐喺會議廳最前面嘅金融服務界張華峰話，宣讀誓詞係一件好簡單嘅事，所以唔使特別練習喎。一早揚言到時會自創宣誓嘅人民力量陳志全（慢必）話，由於其他兩個成員仲未返港，所以仲未決定到時會點做，但就透露三位成員將會有唔同風格同特色，到時一定會令人大開眼界喎。