政情：民記掌舵 譚SIR走不甩
立法會第一大黨民建聯（民記）擁有逾二萬名會員，做得黨主席絕對係攀上政治生涯高峰，但做咗主席近五年嘅譚耀宗（譚sir），原來近年屢次想退下火線，原本諗住喺明年四月換屆正式交棒畀有「橋王」稱號嘅黨副主席劉江華（劉華），但可惜劉華因為意外落選立法會超級區議會選舉，無緣坐上主席寶座，依家分分鐘要譚sir短則做多兩年，耐則做多四年，想走都冇得走。
少則兩年 多要四年
有知情人士話，其實譚sir上屆換屆選舉已有意退下火線，只因撞正去年區議會及今年立法會兩場大型選舉前夕，為咗「維穩」先暫不言退，點知劉華喺剛過去嘅立法會選舉慘遭滑鐵盧，但佢又堅持要樹立黨主席應由立法會議員出任嘅制度，變相將自己接任黨主席嘅大門關上。估唔到一場立法會選舉，意外地令譚sir同劉華嘅政治生涯規劃產生變化。
按目前形勢，睇怕譚sir最少要「捱義氣」少則兩年，甚至係做多四年黨主席都唔出奇，首先民記領導層出現部分斷層，年屆六十歲嘅領導層同四十歲中生代之間，有領導才能僅剩下劉華，一批四十歲中生代要「升呢」順利接班，仍要時間歷練同累積聲望，明年換屆選舉未必夠時間醞釀到接班人。民記主席寶座見證住政治嘅不確定性，政治人物嘅時也命也亦莫過於此。
劉華官場前途未卜
至於無緣做黨主席嘅劉華，政圈盛傳佢有機會入「熱廚房」做惹火嘅政制及內地事務局副局長，但旋即有黨內兄弟表示有保留，底因係一來佢要辭去沙田區議員職務，觀感上實會惹來唔少流言蜚語，二來劉華或有份推銷政改方案，無論如何盡心盡力都會畀人扣上阻礙政制發展嘅帽子。於是有人隨即提出反建議，提議佢考慮其他副局職位，主因係本身「原罪」會較輕喎，究竟劉華最後點抉擇，一切要睇佢嘅政治判斷喇！