中環出更：黃安源為陀飛輪露面
工藝精湛嘅陀飛輪錶，魅力無窮。位於尖沙咀嘅萬希泉陀飛輪展覽館日前開幕，城中靚錶發燒友爭相去一睹為快，包括中華總商會青委副主席張俊勇及林智彬、極地攀山專家曾志成（John）、著名設計師靳棣強等，就連久未露面嘅胡琴大師兼前香港中樂團團長黃安源夫婦都拍拖現身。
近年黃安源較少公開表演活動，事關佢除咗授課練琴之外，花咗唔少時間同埋心思喺古董錶上，仲經常與一班發燒友聚會交流心得。佢話已收藏古董錶多年，仲做埋香港國際古董鐘錶總會副會長，與同為副會長嘅萬希泉名錶創辦人沈慧林（William）因愛錶而結緣，並擔任萬希泉嘅設計顧問，所以幾忙都要來捧場。
曾志成明年再登珠峰
當日仁愛堂總理劉家榮（Kelvin）及知名物理治療師陳國正都喺度，佢哋同William合夥搞展覽館，密謀未來搞一連串活動，誓要將個場地變成旅遊熱點。現場仲展示William父親沈墨寧珍藏嘅數十件清朝木雕，Kelvin笑稱，木雕由杭州運送到現場後，佢擔心到瞓唔着，要加強保安至放心。
近年仁愛堂經常帶學生到極地探險，有份獻策嘅阿John因而與Kelvin結緣。阿John話，籌備緊明年再次造訪世界第一高峰珠穆朗瑪峰，多年前佢已取道尼泊爾成功登峰，今次改由西藏出發，若成事將係首個由中尼兩邊登上高峰嘅香港人。征服全球十四座海拔八千米以上高峰係佢嘅夢想，至今佢已攀登其中三座。
卓妮