政情：方國珊龐愛蘭見面無交流
雖則話選戰場上無朋友，但立法會選舉都過咗兩個星期喇，所有結果都塵埃落定，不過之前喺新界東爭票嘅方國珊同龐愛蘭（Scarlett）尋日一同出席活動見面時就仍然面左左，全程無咩交流，方國珊仲因為有事，活動未完就走，連大合照都無影添！
話說兩女尋日以評審身份一同出席活動，主辦單位「好識趣」咁安排咗二人一齊坐，而兩位女士亦好大方，不斷熱情地同身邊嘅人敍舊同交換卡片，之不過，唔知點解打極招呼都未到並肩而坐的她之嘛，而寒暄一輪過後，雙方都係背脊對住對方。方國珊就話，要同前靚女藝人魏秋樺敍舊。
雖然兩女坐得這麼近，鎂光燈喺佢哋面前閃呀閃，不過二人就避避忌忌，對鏡頭嘅敏感度亦忽然下降，好似唔多想一齊合照，而Scarlett更埋頭苦幹整理卡片，點都唔肯抬頭望向鏡頭，結果要攝影哥哥三催四請，呢個僵局先得以打破，影到一張貌合神離嘅合照。