政情:劉江華三上四落冇着落

立法會選舉有人歡喜有人愁,參選超級區議會嘅民建聯副主席劉江華大熱倒灶,結束十四年議會生涯。佢尋日接受電台訪問時坦言,自廿八歲起從政,至今差唔多已經有廿八年,四年後理應要畀年輕黨員上位。

佢又以一曲《問我》憑歌寄意,特別鍾意「願我一生去到終結,無論歷盡幾許風波」一句,大嘆自己多年嘅政途「三上四落」,承認仕途至今仍然未有着落,會否再有機會重返政壇就留待下回分解。

對於坊間盛傳,雖然劉江華失意立法會,但有機會更上一層樓做副局長,佢尋日就透露,的確有圈外人叫佢試下做副局長,但仲未收到特首梁振英邀請。

佢之後又話,為官者要熟悉行政同立法關係,又以運輸及房屋局局長張炳良做例子,話張炳良既做過立法局議員,又有豐富嘅行政會議經驗,依家處理唔少富爭議性政策都得心應手,莫非佢想暗示自己有條件走入問責班子呢個熱廚房効力?

第一手消息請下載on.cc東方互動iPhone/iPad/Android/Windows Phone Apps