政情：項明生嫦娥月餅送好友
中秋節就快到，傳統雙黃蓮蓉月餅又賣到通街都係，但係始終新意欠奉。不過有「Game界橋王」稱號嘅Sony Computer Entertainment香港分公司董事項明生（James），最近就派送一款餅皮印住可愛公仔嘅雙黃蓮蓉月餅畀城中好友，包裝可愛又應景，令人會心微笑。身在日本公幹嘅James越洋報料話製作公仔月餅係佢多年來嘅願望，努力兩年終於搞掂。
公仔月餅係Sony英國公司專門設計嘅嫦娥遊戲「小小大星球」角色，佢哋特登搵香港一間知名禮餅公司訂造公仔月餅，而呢批月餅數量有限，只係送畀貴賓好友。中國人對月亮有好特別嘅感情，嫦娥奔月嘅故事大家耳熟能詳，James趁此佳節大玩創意，不愧係橋王。James又話，佢好多時中秋節都會出差或旅行，所以每年都會提前同家人過節喎。
